கைப்பேசி வெளிச்சத்தில் பிரசவம்!

தேநீர் செய்திகள்?
தேள் கடி கேள்விகள்!
1.12.2007


செய்தி:

கைப்பேசி வந்தபிறகு வாய், நாக்கு, காது தவிர்த்து மற்ற உறுப்புகளின் வேலையைப் பறித்துவிட்டது. உடல் ரீதியாக இப்படி ஒரு சுயப் பிரச்சினை என்றால் கைப்பேசியில் பேசிக்கொண்டே போவோரால் ஏற்படக்கூடிய பிரச்சினை என்னென்ன என்பதை நீங்கள் மனக்கண்ணில் ஓட்டிப் பார்த்துக்கொள்ளுங்கள். ஒரு பயனும் இல்லாத கைப்பேசியால் இப்போது ஒரு பயன் ஏற்பட்டிருக்கிறது. ரஷியாவில் உள்ள ஷெலெகோவ் நகரைச் சேர்ந்தவர் ரிமா பிவோவரோவா. வயது 22. பிரசவத்திற்காக இந்தப் பெண் ஒரு மருத்துவமனையில் சேர்க்கப்பட்டிருந்தார். இரவு நேரம். மின்வெட்டு ஏற்பட்டிருக்கிறது. மருத்துவமனை உட்பட நகரே இருளில் மூழ்கியிருக்கிறது. மருத்துவமனையிலிருந்த மின்கொடுப்பான் இயந்திரமும் (ஜெனரேட்டர்) இயங்கவில்லை. இந்நிலையில் பிரசவத்தை எப்படிப் பார்ப்பது என்று யோசித்த மருத்துவர்கள், மருத்துவமனையிலிருந்த பனிரெண்டு பேரின் கைப்பேசி வெளிச்சத்தைக் கொண்டு பிரசவம் பார்த்திருக்கிறார்கள்.

கேள்வி:

ஆரம்பத்தில் படிக்கையில் ஆச்சரியமாகத் தெரிந்தாலும் போகப்போக பல அதிர்ச்சிக் கேள்விகளைக் கேட்க வைக்கிறது இந்தச் செய்தி. அவசர மின்விளக்கு ஒன்றுகூடவா இல்லை மருத்துவமனையில்? மெழுகுவர்த்திக்கூடவா கிடைக்கவில்லை? கைப்பேசியை முடுக்கிவிட்டுவிட்டு பிரசவ அறையைவிட்டு யாரும் வெளியில் போயிருக்க முடியாது. ஏனென்றால் சில நொடிகள் இயங்காவிட்டாலும் கைப்பேசி அணைந்துவிடும். அதை அழுத்திக் கொண்டே இருந்தால்தான் வெளிச்சம் கிடைக்கும். அப்படியென்றால் அழுத்திக்கொண்டிருந்த பனிரெண்டு பேர் யார்? மருத்துவர்கள் தவிர்த்து வெளி நபர்கள் பிரசவ அறையில் இருப்பது மருத்துவச் சட்டப்படி குற்றம். தமிழகத்தில் ஒரு மருத்துவரின் பையன் பிரசவம் "பார்த்தது" தவறு என்று குற்றம் சாட்டப்பட்டு தண்டனை வழங்கப்பட்டிருக்கிறது. இத்தனைக் கேள்விகளையும் இந்தச் செய்தி கேட்கிறது. எது எப்படியிருந்தாலும் அந்த ரஷ்ய குழந்தை நன்றாக இருக்கிறது என்பது பெரிய சந்தோஷம்.