Monday, December 3, 2007

கத்தியோடு ஜனாதிபதி!





கொட்டாவியை
விரட்டும்
மிட்டாய்கள்!
(3.12.2007)



இட்லி சாப்பிட்டுக்கொண்டிருந்தார் ஒருவர். முதலில் சட்னி ஊற்றினார் சர்வர். இரண்டாவதாகச் சாம்பாரை ஊற்றுகிறபோது சட்னி மீதே ஊற்றினார். சாப்பிட்டவர், "சட்னி மேலயே ஊத்துறீங்களே... ஓரமாக ஊத்த வேண்டியதுதானே...'' என்றார். "என்ன சார், ரெண்டும் ஒன்றாகத்தானே வயித்துக்குள்ள போகப்போகுது. சும்மா சாப்பிடுங்க சார்'' என்றார் சர்வர். சாப்பிட்டவருக்குக் கோபம். சாப்பிட்டு முடித்துப் போகிறபோது சட்னி வாளியில், சாம்பார் வாளியைக் கவிழ்த்து வைத்துவிட்டு சென்றார். வாய் திறக்க முடியாமல் நின்றார் சர்வர்.


***

மூதாட்டி ஒருவரின் வீட்டில் அமர்ந்து சாப்பிட ஆரம்பித்தார் மாறுவேடத்திலிருந்த சத்ரபதி சிவாஜி. எடுத்துச் சாப்பிட முற்பட்டபோது, சூடாக இருந்ததால் சாதம் கையைச் சுட்டது சிவாஜிக்கு. கையை ஊதிக்கொண்டே இருந்த சிவாஜியைப் பார்த்து மூதாட்டி சொன்னாள்: " நீ ஊதுவதைப் பார்க்கிறபோது சிவாஜி செய்வதுபோலவே இருக்கிறது'' என்றார். சிவாஜிக்கு அதிர்ச்சி. மூதாட்டி கண்டுபிடித்துவிட்டாளோ என அதிர்ந்தபடியே என்னவெனக் கேட்டார். "தட்டின் நடுவே இருந்த சோற்றில் கை வைத்துக் சுட்டுக்கொண்டாய். தட்டின் ஓரத்தில் உள்ள சாதத்தை எடுத்துச் சாப்பிட்டால் கை சுடுமா? சிவாஜியும் அப்படித்தான் எடுத்த எடுப்பிலேயே பெரிய கோட்டைகளைப் பிடிக்கத் துடிக்கிறார். சிறிய சிறிய கோட்டைகளாகப் பிடித்து போனால்தான் சரியாக இருக்கும்'' என்றிருக்கிறாள் மூதாட்டி. உணர்ந்த அறிவின்படி நடந்துகொண்டார் சிவாஜி.


***

வின்ஸ்டன் சர்ச்சில் பேசுகிறார் என்றால் கூட்டத்திற்குக் குறைவு இருக்காது. இது பற்றி சர்ச்சிலிடம் அவரது நண்பர், "கூடுகிற கூட்டத்தைப் பார்த்து உங்களுக்குப் பெருமையாக இல்லையா?'' என்று கேட்டார். வின்ஸ்டன் சொன்னார்: " என்னைத் தூக்கில் போடுகிறார்கள் என்று சொன்னால் இதைவிட கூட்டம் அதிகமாக வரும்'' என்றார்.

***

அமெரிக்க ஜனாதிபதி ஆபிரகாம் லிங்கன் அறையில் எப்போதும் ஒரு பெரிய கத்தி இருக்கும். அந்தக் கத்தி வருகிறவர்களை மிரட்டுவதற்காக என்று நினைத்தால் லிங்கனைப் பற்றி உங்களுக்குத் தெரியாது என்று அர்த்தம். சரி... இப்போது இது தேவையில்லாத விஷயம். லிங்கன் இளைஞனாக இருந்தபோது ஒருவர் அந்தக் கத்தியைக் கொடுத்து, "உங்களைவிட அசிங்கமாக யாராவது இருந்தால் கொடுத்துவிடுங்கள்'' என்று கொடுத்தாராம். அந்தக் கத்தியைத்தான் லிங்கன் அறையில் வைத்திருந்தாராம். பிற்காலத்தில் அந்தக் கத்தியை அவரது மந்திரிகளில் ஒருவருக்குக் கொடுத்துவிட்டதாகக் கேள்வி.

***

Sunday, December 2, 2007

முறை தவறுவதென்றால் எம்.பி.க்களுக்கு புது அர்த்தமா?


தேநீர் செய்திகள்?
தேள் கடி கேள்விகள்!
(3.12.2007)

செய்தி:

நாடாளுமன்றத்துக்கு உள்ளேயும் வெளியேயும் எம்.பி.க்கள் முறை தவறி நடந்து கொண்டார்கள் என்பதை எப்படி முடிவு செய்வது? இதை முடிவு செய்வதற்காகவே நாடாளுமன்ற உயர் நிலைக்குழு அமைக்கப்பட்டுள்ளது. இக்குழு பல்வேறு கட்சித் தலைவர்களுக்கும் எம்.பிக்களுக்கும் கேள்விகளை அனுப்பியுள்ளது. இக்குழுவின் தலைவர் காங்கிரஸ் எம்.பி. கிஷோர் சந்திரதேவ், இக்கேள்விகளை பலமுறை அனுப்பியுள்ளார். முறைதவறி நடந்து கொண்டார்கள் என்ற சொல்லுக்குச் சரியான அர்த்தம் என்ன? என்று தெரிவிக்குமாறு அவர் கேட்டுள்ளார். ஒரு எம்.பி. முறை தவறி நடந்து கொண்டதாகத் தெரிய வந்தால், அவரை எம்.பி. பதவியில் இருந்து விலகுமாறு கேட்க அவர் சார்ந்துள்ள கட்சிக்குக் கட்டாயம் ஏதும் உள்ளதா என்று கருத்து தெரிவிக்குமாறும் அவர் கேட்டுள்ளார். எந்தெந்த செயலையெல்லாம் முறை தவறிய செயல் என்று வகைப்படுத்த வேண்டும் என்று இக்குழு கேட்டுள்ளது. ஒரு எம்.பி. அல்லது எம்.எல்.ஏ செய்யும் எல்லாத் தவறுகளையும் முறை தவறிய செயல் என்று முத்திரைக் குத்தி விடமுடியாது என்றும் கூறியுள்ளார் கிஷோர் சந்திரதேவ். ஒரு எம்.பி. வாகனத்தில் வரும்போது போக்குவரத்துச் சிக்னலை மீறிச் சென்றால் அது முறைகேடு அல்ல என்று பொதுவாகக் கருதப்படுகிறது. அதே நேரத்தில் தண்டனைக்குரிய குற்றத்தை ஒரு எம்.பி. செய்தால் அதுவும் அவரது முறைகேடான செயல் என்று முடிவு செய்யலாமா? என்று கேட்டுள்ளார் தேவ்.எம்.பி.க்களுக்கு வழங்கப்படும் சலுகைகள் மற்றும் வசதிகளை ஒரு எம்.பி. தவறாகப் பயன்படுத்தி தண்டனைக்குரிய குற்றத்தைச் செய்வதையும், மற்ற விதமான குற்றங்களை அவர் செய்வதையும் வேறுபடுத்தலாமா? என்றும் அவர் கேட்டுள்ளார்.நாடாளுமன்றத்தில் கேள்வி கேட்க, லஞ்சம் வாங்கியதாக புகாருக்கு ஆளான 11 எம்.பிக்கள் பதவி நீக்கம் செய்யப்பட்டனர். இதுபற்றி புலன்விசாரணை நடத்துமாறு போலீஸôருக்கு தில்லி உயர்நீதிமன்றம் உத்தரவிட்டுள்ளது. 11 எம்.பிக்கள் பதவி நீக்கம் செய்யப்பட்டது, இந்திய நாடாளுமன்ற வரலாற்றில் முதல் முறையாகும்.இதேபோல எம்.பி.க்களுக்கு வழங்கப்படும் சலுகையைத் தவறாகப் பயன்படுத்தி, வெளிநாடுகளுக்கு ஆட்களை அனுமதியின்றி அழைத்துச் சென்றதற்காக குஜராத்தைச் சேர்ந்த பாரதிய ஜனதா கட்சி எம்.பி. பாபுபாய் கட்டாரா மக்களவையில் இருந்து சஸ்பெண்ட் செய்யப்பட்டார். தற்போது அவர் சிறையில் இருக்கிறார். இத்தகைய சூழ்நிலையில்தான் எம்.பிக்கள் முறைகேடாக நடந்துகொண்டார்கள் என்பதை எப்படி முடிவு செய்வது என்று அறிய நாடாளுமன்ற உயர்நிலைக்குழு அமைக்கப்பட்டுள்ளது. தண்டனைக்குரிய குற்றத்தை ஒரு எம்.பி. செய்தால், நீதிமன்றத்தில் அவர் மீதான குற்றச்சாட்டு நிரூபிக்கப்பட்ட பிறகுதான், அவர் முறை தவறி நடந்து கொண்டதற்காக நாடாளுமன்றம் நடவடிக்கை எடுக்க வேண்டுமா? என்று இந்தக் குழு கேட்டுள்ளது.

கேள்வி :

முறை தவறி நடந்து கொண்டவர்கள் மீது நடவடிக்கை எடுப்பதற்கு ஏற்கனவே பல சட்டத்திட்டங்கள் இருக்கின்றன. இது உயர்ரகக்காரர்களின் முறைதவறி. நாடாளுமன்ற சட்டமன்ற உறுப்பினர்கள் மக்களின் பிரதிநிதிகள் என்பது அவர்களுக்கு மறந்தேபோய்விட்டதால் உயர்ரகக்காரர்கள் என்று தங்களுக்குத் தாங்களே நினைத்துக்கொண்டிருக்கிறார்கள். அதனால் இவர்கள் முறைதவறி நடந்துகொண்டார்கள் என்று குற்றம் சாட்டினால், அது எந்தவகையிலான முறைதவறி என்பதை நிர்ணயிக்க குழு அமைத்திருக்கிறார்கள். சட்டம் என்பது சாமான்யன் முதல் சகலருக்கும் ஒரே நீதியைச் சொல்லக்கூடியது என்பதும் இவர்களுக்கு மறந்துபோய்விட்டது. முறைதவறி நடந்துகொண்டால் இவர்களுக்கு என்ன மாதிரியான தண்டனை கொடுப்பது? யார் தண்டனை கொடுப்பது? என்பதையெல்லாம் முடிவு செய்ய அமைக்கப்பட்டுள்ள குழுவுக்குத் தலைவர் ஒரு காங்கிரஸ் எம்.பி. இவர் தலைமையிலான குழு இதுகுறித்து எம்.பி., எம்.எல்.ஏக்களிடம் கருத்து கேட்கிறது. இருக்கிற சட்டத்தின்படி தண்டனைகளை வழங்காமல் புதிய முறையை அறிய முற்படுகிறவர்கள் கருத்துக்களை யாரிடம் கேட்க வேண்டும்? அந்தக் குழுவுக்கு யாரை தலைவராக நியமிக்கவேண்டும்? ஓர் ஓய்வுபெற்ற தேர்தல் அதிகாரியை நியமிக்கலாம்..... ஓர் ஓய்வுபெற்ற நீதிபதியை நியமிக்கலாம். மக்கள் உட்பட எல்லோரின் கருத்துகளைக் கேட்டறிந்து முடிவு செய்யலாம். அதைவிட்டு சட்டமன்ற, நாடாளுமன்ற உறுப்பினர்களிடம் மட்டும் கேட்டுவிட்டு, ஒப்புக்கு கல்வியாளர் உட்பட சிலரிடம் கேட்பது எப்படி நியாயமாக இருக்கும்? குழு எடுக்கிற முடிவு எந்தவகையிலும் தங்கள் அதிகாரத்தைப் பாதித்துவிடக்கூடாது என்கிற தெளிவான எண்ணத்துடனே காங்கிரஸ் எம்.பி. தலைமையில் குழு அமைத்திருக்கிறார்கள் என்றால் எதற்கு இந்த நாடகம்? குழுவே அமைக்காவிட்டாலும் உங்களை யாரும் கேள்வி கேட்கப் போவதில்லை. ஒருவேளை யாரும் எதிர்பாரா வண்ணம்... குழு நியாயமாகவே கருத்துக் கேட்டு... அந்தக் கருத்துக்களின் அடிப்படையில் சட்டம்கொண்டு வந்துவிட்டாலும்..... சட்டத்துக்குள் ஓட்டைப் போடவா உங்களுக்குத் தெரியாது?

மிரட்டல் கூட்டணி வாழ்க!


தேநீர் செய்திகள்?
தேள் கடி கேள்விகள்!
(2.12.2007)

செய்தி:
தமிழக அரசு வெளியிட்டுள்ள செய்தி குறிப்பில் உள்ள விஷயம்:
மருத்துவக் கல்லூரி மாணவர்களின் படிப்புக் காலத்தை ஆறரை ஆண்டுகளாக மத்திய அரசு நீட்டிக்கப் போவதாக அறிவித்ததைத் தொடர்ந்து அந்த மாணவர்கள் சாகும் வரை உண்ணாவிரதப் போராட்டம் நடத்தியபோது முதலமைச்சர் கருணாநிதி மாணவர்களின் பிரதிநிதிகளை தலைமைச் செயலகத்தில் சந்தித்து, இந்தப் பிரச்சினை குறித்து மத்திய அரசுக்குத் தானே கடிதம் எழுதுவதாகவும் அவர்கள் உண்ணாவிரதப் போராட்டத்தைத் திரும்பப் பெறவேண்டும் என்றும் கேட்டுக் கொண்டதின் பேரில் அவர்கள் போராட்டத்தைக் கைவிடுவதாகப் பத்திரிகையாளர்களிடம் தெரிவித்தபோதிலும் இந்நாள் வரை போராட்டத்தைத் தொடர்ந்து கொண்டிருக்கிறார்கள். முதலமைசóசர் கருணாநிதி மாணவர்களிடம் உறுதியளித்தவாறு பிரதமருக்கும் மத்திய அரசின் மக்கள் நல்வாழ்வுத் துறை அமைச்சருக்கும் கடிதம் எழுதப்பட்டுள்ளது. அந்தக் கடிதத்திற்குப் பதில் எழுதியுள்ள மத்திய சுகாதாரத்துறை அமைச்சர் இந்தப் பிரச்சினை குறித்து குழு நியமிக்கப்பட்டு உள்ளதாகவும், அதன் முடிவினை எதிர்பார்த்து இருப்பதாகவும் கூறியிருக்கிறார். இந்நிலையில் மாணவர்கள் தங்கள் போராட்டத்தைத் தொடர வேண்டிய அவசியம் இருப்பதாகத் தெரியவில்லை. எனவே மருத்துவக் கல்லூரி மாணவர்கள் தங்கள் போராட்டத்தைக் கைவிட்டு உடனடியாகக் கல்லூரிகளுக்குத் திரும்பி தங்கள் படிப்பினைத் தொடர வேண்டும் என்று கேட்டுக்கொள்ளப்படுகிறது.3}ந்தேதிக்குள் மாணவர்கள் கல்லூரிகளுக்குத் திரும்பாவிட்டால் அன்று முதல் கல்லூரிகளையும் விடுதிகளையும் தற்காலிகமாக மூடுவதைத் தவிர அரசுக்கு வேறு வழி இல்லை என்பது இதன் மூலம் அறிவிக்கப்படுகிறது.

கேள்வி:

வேறு வழி இல்லை என்றால் என்ன அர்த்தம்? ஏன் தற்காலிகமாக மூடப் போகிறீர்கள். நிரந்தரமாகவே மூடிவிடுங்களேன். குழந்தையையும் கிள்ளிவிட்டு, தொட்டிலையும் ஆட்டுவதற்கு மருத்துவக் கல்லூரி மாணவர்கள் என்ன குழந்தைகளா? (பா.ம.க.வினர் புலம்பல் அடிப்படையில் எழுதப்படுவது... தொட்டிலை ஆட்டிவிட்டு... ) இராணி மேரி கல்லூரி இடிப்பதற்கு ஜெயலலிதா ஆட்சியில் முன்வந்தபோது மாணவிகள் அன்று உள்ளிருப்புப் போராட்டம் பல நாட்கள் நடத்தினார்கள். அக்கல்லூரி மாணவிகளை நேராகவே சந்தித்து ஆதரவு தெரிவித்துவிட்டு வந்தார் ஸ்டாலின். இதை அதிமுக ஆட்சி பெரிதாக்கி, அத்துமீறி கல்லூரியில் நுழைந்ததாக வழக்குத் தொடர்ந்தார்கள். அந்த வழக்கை பற்றிகூட கவலைப்படாமல் அந்த மாணவிகளுக்கு ஆதரவு நல்கியது ஸ்டாலின் மட்டுமல்ல; திமுக தலைவர் கருணாநிதியும்தான். ஆனால் இன்று அவர்களுடைய ஆட்சி. அதுவும் மத்திய அரசை எதிர்த்துத்தான் போராட்டம் நடத்துகிறார்கள். இதில் இன்னும் தெளிவான ஒரு முடிவு எட்óடப்படவில்லை. தமிழக அரசு வெளியிட்டுள்ள அறிக்கையில் கூறியுள்ளபடி முதலமைச்சர் நடவடிக்கை எடுத்திருப்பதும், குழுவின் முடிவுக்குக் காத்திருக்கிறோம் என்று அன்புமணி ராமதாஸ் விளக்கம் கொடுத்திருப்பதும் உண்மையாகவே இருக்கலாம். குழு முடிவு நாளைக்கே வேறுவிதமாக வந்துவிட்டால் என்ன ஆவது என்று மாணவர்கள் பயப்படுகிறார்கள். கடந்த காலங்களில் குழு போட்டு அவை எடுத்த முடிவுகளை எல்லாம் மாணவர்கள் அறியாமலா இருப்பார்கள்? இதனால் போராட்டத்தைத் முடித்துக் கொள்வதற்குத் தயங்கலாம். இóப்படிச் சொல்வதால் மாணவர்கள் போராட்டத்தைத் தொடர வேண்டும் என்றும் அவர்கள் படிப்பைப் பாழ்படுத்திக்கொள்ள வேண்டும் என்றும் சொல்லவரவில்லை. எந்தப் போராட்டமுமே, அளிக்கக்கூடிய பயன்பாடுகளைப் பாழ்படுத்திவிட்டும், அன்றாட நடைமுறைகளைச் சீர்குலைத்துவிட்டும் நடத்துகிற போராட்டமாக இருக்கக்கூடாது என்கிற எண்ணம்தான் நம்முடையதும். ஆனால் இதில் நமக்கு ஏற்படும் ஆதங்கம் திடீரென்று இவ்வளவு ஆவேசமாக மிரட்டும் தொனியில் அறிக்கை வெளியிட வேண்டிய அவசியம் என்ன வந்தது. மருத்துவக் கல்லூரி மாணவர்களை தமிழக அமைச்சர் தூண்டிவிடுகிறார் என்று ராமதாஸ் குற்றம்சாட்டிக்கொண்டிருந்தாரே அதற்குப் பயந்துதானே? ஒரு நாள் விட்டு ஒரு நாள் தமிழக அரசைக் குறை கூறி ராமதாஸ் அறிக்கை விடுகிறார். மக்களுக்குத் தேவையானவற்றைச் சொன்னால் கருணாநிதிக்குக் கோபம் வருகிறது. தமிழக அரசுக்குக் கோபம் வருகிறது என்றெல்லாம் ஆணித்தரமாகவே ராமதாஸ் சொல்கிறார். திமுக அரசுக்கு ஏன் அந்தத் தைரியம் வர மறுக்கிறது. உங்கள் நிலைபாட்டைத் தெளிவுப்படுத்த வேண்டியதுதானே... அதைவிட்டு ராமதாஸ் மனம் நோகாமலிருக்க அன்புமணõ ராமதாஸýக்குச் சாதகமாக நடப்பதுபோல் மாணவர்களை மிரட்டி அறிக்கை விடுகிறீர்களே .... என்ன உங்கள் மிரட்டல் கூட்டணி தர்மம்! வாழ்க.. அடுத்த தேர்தல் வரை!

பின்னல் கடிகாரத்தில் போதை வஸ்து!





எங்கோ
போகும் மேகம்
உன்
முகவரியில்
மழையைத் தூவுகிறது
முன்பே நீ
சிரபுஞ்சியைச்
சிண்டில் முடிந்திருக்கிறாய்

முட்டைச்சூட்டின்
கதகதப்பைப் பெற
காதலில் மூழ்கு.
***

நிழலை நீட்டி
தவமிருக்கும்
நீளக்கோபுரம்
ஓரமாய்ச் செல்லும்
உன்னிடம்
உறிஞ்சுகிறது
உயர அமைதி.
***

எல்லாச் சுவைகளையும்
பின்னுக்குத் தள்ளிய
முதல் சுவை நீ

நான்
உண்ண
உனக்குப்
பசிக்க வேண்டும்.

தேகம் முழுவதும் வயிறு
தாகம் தீர
போதாது இரவு

தீக்குளிக்க
நீர் அலைபுரளும்.
****

நெடு
தூரத்திலேயே
என்னைத்
துளைத்த நெடியால்
போதை

உன்
பின்னல் கடிகாரத்தில்
போதை வஸ்து

அருகிலேயே
என்னை
அழைத்தத் தீயால்
மரணம்.

உன்
விழிகளில்
கன்னிவெடி.
****

Saturday, December 1, 2007

உப்புமா அழகி... உலக அழகியா?



2007-ஆம் ஆண்டின் உலக அழகியாகத் தேர்ந்தெடுக்கப்பட்டுள்ள சீன நாட்டைச் சேர்ந்த ஷாங் ஜிலினுக்குத் தமிழ் தெரியாது என்கிற முழு நம்பிக்கையுடனும், தமிழ் தெரிந்த யாரும் இந்தச் செய்தியைக் கடத்திக் கொண்டுபோய் அவரிடம் போட்டுக் கொடுக்கமாட்டீர்கள் என்ற நம்பிக்கையுடனும், குறிப்பாகப் பெண்கள் சொல்லவே மாட்டீர்கள் (சொல்லாதீர்கள் என்றால் சொல்லு... சொல்லு என்று அர்த்தப்படுத்திக்கொள்ள வேண்டாம்.) என்கிற நம்பிக்கையுடனும், சீன தமிழ் வானொலி அறிவிப்பாளர்கள் யாராவது இதைப் படித்துவிட்டால் "ஷார்ட் டைம் மெமரி லாஸ்' தங்களுக்கு இருப்பதாக நினைத்து மறந்துவிடவேண்டும் என்று கேட்டுக் கொண்டும் எழுதுகிறோம். அதுவும் இது நாங்கள் தனிப்பட்ட முறையில் எழுதுகிற கடிதம் இல்லை. சாட்சாத் பலருடைய மனசாட்சியைத் திறந்து வைத்து ஷாட்... காமிரா... ஆக்சன் சொல்லி எடுக்கப்பட்டதைத்தான் எழுதுகிறோம். பல மாவட்டக்காரர்களின் பேச்சு வழக்கில்தான் இதை முறைப்படி எழுதவேண்டும். எல்லோருடைய கருத்தும் ஒரே மாதிரியாக இருந்ததால், புத்தகத் தமிழிலேயே எழுதி விடுகிறோம். அதை நீங்கள் படிக்கிறபோது உங்கள் மாவட்டக் கொச்சைத் தமிழில் மாற்றிப் படித்துக் கொள்ளுங்கள்....

பொதுவா என்னா ஜொள்றாங்கன்னாப்பா.... வருஷத்துக்கு ஒரு மொற உலக அளகின்னு ஒரு பிகர சலக்ஷன் பண்றாங்க. இதுனால நமக்கு என்னாங்கற .... அதுகாட்டி ஜெயிச்சி உலகம்பூரா திரியுது.... ஏதோ ஜொள்வாங்களே... அதாம்பா ... அது பேருன்னா.... எய்ட்ஸ்க்குப் பிச்சாரம், கன்சருக்குப் பிச்சாரம்னு ஜெயிச்ச உடனே ஜொள்ளும்... அப்புறம் வெளியில வர்வே மாட்டுது... நம்ப சென்னைக்கு வந்தா தாம்பா வெளியல வந்தாமாதிரியே அர்ர்ர்த்தம். அப்புறம் ரெண்டு மூணு ஹாலிவுட் படத்துல நடிச்சுகிணு துட்டு பாக்குது.. அப்புறம் யாரையாவது இசுத்துக்கினு போயி செட்லாகுது... இந்த அளகிகளால நமக்கு என்ன புரயோசனம் ஜொள்ளு... ஒர்ரு தபா அளகி போட்டியையாவது நம்மல பாக்க வுடுறானுங்களா... அவுனுங்களே பாக்குறானுங்க... சலக்ஷன் பண்றானுங்க.... இன்னொன்னுப்பா கொஞ்சம் கூச்சமாதான் இருக்கு. இருந்தாலும் ஜொள்ரன். ஆசயாவே அந்த அளகி நம்மள பாத்தாலும் நமக்குப் புடிக்காதுப்பா... வத்தலா தொத்தலா பாக்கவே சகிக்கிலப்பா... டிவில பாக்கக்கோலியோ... அது உப்புமா அளகின்னு தெரிஞ்சுபுடுது... என்னதான் சொல்லுப்பா நம்ம இட்லிக் கடை முனியம்மா மாதிரி வர்மா. அதாம்பா நம்ப உலக அளகி. க்ரிக்டா..... (புத்தகத் தமிழில் எழுத மறந்துவிட்டோம்.)

முனியம்மாக்கள், கஸ்தூரியாக மாறுகிறார்கள். மலர்விழி, விஜி, நிரோஷா, நமீதா, ரேஷ்மா, கனிகா, ரம்யா, கீதா, லாவண்யா, மணிஷா, சுஜிதா, நீலவேணி, சந்திரிகா,......... நடிகை சினேகா என்று மாறிக்கொண்டே இருக்கிறார்கள். அவரவர் உலகிலும் அவரவருக்கு ஓர் உலக அழகி..

வாரே... வா என்ஜினியரே!


இறுதி ஓவர். இரண்டு பந்துகளில் மூன்று ரன்கள் எடுத்தால் எதிரணி வெற்றிபெற்றுவிடும். இந்த இக்கட்டான நேரத்தில் ஒரு சிறந்த கேப்டன் எடுக்கக்கூடிய முடிவு என்னவாக இருக்கும்?
வேகப்பந்து வீசுபவர்களையே போடவிட்டாலும் ஸ்லோவாகவே பந்தை வீச வைப்பார்கள். இப்படிப் போட்டால் மட்டும் வெற்றி கிடைத்துவிடுமா? என்றால், கிடைத்திருக்கிறது என்று நிறைய உதாரணங்களைச் சொல்லலாம்.

சிலிர்ப்பை ஏற்படுத்திய ஓர் உதாரணம்.
ஸ்டீவ்வாக் உலகக் கோப்பையை வாங்குவதற்கு காரணமான ஓர் ஆட்டம். தென் ஆப்ரிக்காவும், ஆஸ்திரேலியாவும் அரையிறுதியில் மோதின. இரண்டு அணிகளுக்குமே வாழ்வா? சாவா? -ஆட்டம். எல்லா அணி பந்து வீச்சாளர்களின் பந்துகளையும் அடித்து துவம்சம் செய்த குளுசனர் மைதானத்தில் நிற்கிறார். அவருடன் டொனால்ட். ஆனால் கடைசி விக்கெட். மூன்று பந்துகளில் ஒரு ரன் எடுக்க வேண்டும். "அவ்வளவுதான் ஆஸ்திரேலியா அவுட். பொட்டியைக் கட்டிக்கிட்டு ப்ளைட் பிடிக்க வேண்டியதுதான்' என்று எல்லோருமே கருதிவிட்டனர். ஆனால் ஸ்டீவ்வாக் அப்படிக் கருதவில்லை. அவர்களுக்குக் கொடுக்கயிருந்த ப்ளைட் டிக்கெட்டை தென்ஆப்ரிக்கா அணிக்கே திருப்பிக் கொடுத்து அனுப்பிவிட்டார். இது எப்படி முடிந்தது?

எல்லா வீரர்களையும் முதல் வட்டத்திற்குள் கொண்டு வந்தார். பாதி வீரர்களை மிக குளோஸ்-அப் பீல்டிங் செய்ய வைத்தார். உலகக் கோப்பை முழுவதும் சிங்கம்போல் கர்ஜித்து விளையாடிய குளுசனரே நடுங்க ஆரம்பித்துவிட்டார். வேகப்பந்து வீச்சாளர் ஸ்லோவாகப் பந்தை வீசுகிறார். குளுசனர் மெல்லத் தட்டிவிடுகிறார். டொனால்ட் ஓட்டமெடுக்க குளுசனருக்கு அழைப்புக் கொடுக்கிறார். ஓடுகிறார்கள். திக்..திக்.. திருப்பம். ஓடிய பந்தைப் பிடித்து ஒரு வீரர் அடிக்கிறார். ரன் அவுட். "ப்ளைட்டிக்கெட்' விதி திரும்பியது. வெற்றி பெற்ற ஆஸ்திரேலியா இறுதியாட்டத்திலும் வெற்றிபெற்று கோப்பையைத் தட்டிச் சென்றது. இதே அணுகுமுறைக்குக் கிடைத்த வெற்றியாகத்தான் அனில் கும்பளேவுக்கு கேப்டன் பதவி கொடுத்ததையும் பார்க்க வேண்டியிருக்கிறது.

உலகக் கோப்பையை ஸ்டீவ்வாக் பெற்றபோது அவருக்கு வயது 37. டெஸ்ட் ஆட்டத்திற்கு கேப்டன் பதவியை ஏற்றுக்கொண்டிருக்கிற கும்பளேவுக்கும் வயது 37. அணியில் இடம்பெறுவதற்கே சிரமப்பட்டுக் கொண்டிருந்தார் கும்பளே. எடுப்பதும் விடுப்பதுமாகவே இருந்தது அவரது நிலை. இக்கட்டான கடைசி ஓவரில் ஸ்லோ பால் போடுவதுபோல கேப்டன் பதவி கொடுக்கப்பட்டது. அதுவும் கேப்டன் பதவியை சச்சின் ஏற்றுக்கொள்ள மறுத்ததால் மற்றவர்களுக்குக் கொடுப்பதற்குப் பல்வேறு பிரச்சினைகள் இருந்ததால் கும்பளேவுக்குத் தரப்பட்டது.

அணியிலேயே இடம்பெறமுடியாதவர் எப்படி அணியையே தலைமை தாங்கி நடத்தப் போகிறார் என்றுதான் எல்லோரும் நினைத்துக்கொண்டிருந்தார்கள். தென் ஆப்பிரிக்க கனவை ஸ்டீவ்வாக் தகர்த்ததுபோல பலரின் தவறான நினைப்பை இப்போது கும்பளேவும் தகர்த்துவிட்டார். சிறந்த கேப்டன் ஷிப் என்று பாராட்டாதவர்களே இல்லை என்கிறளவுக்கு சிறப்பாகக் களத்தில் செயல்பட்டார். இந்திய அணியின் பெரும்பாலான தோல்விக்கு முக்கிய காரணமே வீரர்களிடையே இருக்கும் ஈகோதான் காரணம். ஆனால் கும்பளே தலைமையில் வீரர்கள் யாருக்கும் அதிருப்தி இருப்பதாகத் தெரியவில்லை. வீரர்கள் எந்தெந்த வகையில் எந்தெந்த நேரத்தில் பயன்படுத்த வேண்டுமோ அந்தவகையில் பயன்படுத்த கும்பளேவுக்குத் தெரிந்திருக்கிறது. மூத்த உறுப்பினர்களுக்கே அதிக முக்கியத்துவம் கொடுப்பதாகச் சிறு சலசலப்பு ஏற்பட்டாலும் அந்த முடிவு பெரிய தொய்வை முதல் டெஸ்ட் பந்தயத்தில் அணிக்கு ஏற்படுத்திக் கொடுத்ததாகத் தெரியவில்லை. குறிப்பாக கங்குலியை அதிகம் பயன்படுத்தினார். ஆனால் இது அணிக்குப் பலத்தையே கொடுத்தது. மூன்றாம் நாள் கங்குலி எடுத்த ஆட்டத்தில் தொடர்ச்சியாய் எடுத்த இரண்டு விக்கெட்டுகளே அணியின் வெற்றிக்குத் திருப்பமாய் அமைந்தது என்பதை எல்லோருமே ஒத்துக்கொள்வார்கள். இதைப்போல சிறப்பாக ஃபீல்டிங் அமைப்பதும், இக்கட்டான கட்டங்களிலும் முடிவு எடுப்பதுதான் கேப்டனின் முக்கியமான பணி. அநுபவ முதிர்ச்சியின் காரணமாக கும்பளே இப்பணியை நேர்த்தியாகவே கையாளுகிறார். இப்படிக் கையாண்டதற்கு அடையாளம் கேப்டன் பதவியேற்ற முதல் ஆட்டமே வெற்றி. அதுவும் ஏழு விக்கெட்கள் வீழ்த்தி ஆட்ட நாயகன் விருதையும் பெற்றுள்ளார் கும்பளே.

சுவிட்ச் போடாத மின்விசிறி எப்படிச் சுற்றும்? கேப்டன் பதவி என்கிற சுவிட்சை இப்போது போட்டிருக்கிறார்கள். என்ஜினியர் பட்டம் பெற்ற கும்பளே சுழற்பந்தில் சுழலுது எதிரணி .

முடி வளராதென்றால் மொட்டையடிப்பார்களா?



தேநீர் செய்திகள்?
தேள் கடி கேள்விகள்!

(1.12.2007)



செய்தி:



எம்.பி.பி.எஸ் படிக்கும் மாணவர்களுக்கு ஓராண்டு கட்டாயக்
கிராமப்புற சேவை திட்டம் அமல்படுத்தப்படும் என்று மத்திய மந்திரி
டாக்டர் அன்புமணி ராமதாஸ் அறிவித்தார். ஆனால் இந்தத் திட்டம்
அமல்படுத்தப்பட்டால், எம்.பி.பி.எஸ். படிப்பு காலம் ஐந்தரை
ஆண்டிலிருந்து ஆறரை ஆண்டுகளாக நீட்டிக்கப்படுவதாகக் கூறி
மாணவர்கள் போராட்டத்தில் ஈடுபட்டு வருகிறார்கள். இதில் ஒரு
கட்டமாக கோவை மருத்துவக் கல்லூரி மாணவர்கள்
மொட்டையடித்துக் கொள்ளும் போராட்டத்தில் ஈடுபட்டனர்.
இதையொட்டி கோவையை அடுத்த பேரூர் பட்டீசுவரர் கோவிலில்
மருத்துவக் கல்லூரி மாணவ}மாணவிகள் 650 பேர் திரண்டனர்.
தங்கள் கோரிக்கைகளை நிறைவேற்ற வேண்டி அவர்களில்
ஐந்துபேர் மொட்டையடித்துக் கொண்டனர். மேலும் மாணவிகள் 50
பேர் அடி பிரதட்சணம் செய்தனர். அவர்கள் கோவிலைச் சுற்றி
அடிமேல் அடி வைத்து நடந்து வந்து சிறப்பு பிரார்த்தனையிலும்
ஈடுபட்டனர். நெல்லையில் தூக்கில் தொங்கும் போராட்டத்தில்
மாணவர்கள் ஈடுபட்டனர். முகத்தைக் கறுப்பு துணியால்
மறைத்துக்கொண்டும், கழுத்தில் கயிறு மாட்டிக் கொண்டும்
போராடினர்.

கேள்வி:

மருத்துவம் படித்த அனைவருமே நகர்ப்புறம் சார்ந்தே இருக்க
விரும்புகிறார்கள். வருமானம் அதிகம் கிடைக்கும் என்கிற
எண்ணத்துடன்தான் அவர்கள் நகர்ப்புறத்தை நாடுகிறார்கள். (பணமே வாங்காமல் மருத்துவச் சேவை மட்டுமே செய்யும் சில மருத்துவர்கள் நகர்ப்புறங்களிலும், கிராமப்புறங்களிலும் இருக்கிறார்கள். இது அவர்களைக் குறிப்பிடுவன அல்ல.)
பத்தாவது, பனிரெண்டாவது வகுப்பில் அதிகம் மதிப்பெண்கள்
எடுத்த மாணவ-மாணவிகளைக் கேட்டால், "நான் ஏழைகளுக்குப்
பாடுபடப் போகிறேன்... கிராமப்புற மக்களுக்குச் சேவை செய்யப்
போகிறேன்' என்று சொல்வார்கள். ஆனால் படிப்பு முடிந்தபிறகு
அப்படிச் சொன்னோம் என்கிற எண்ணமே மாணவர்களுக்கு
வராதளவு சமூகச் சூழல் அவர்களை மாற்றிவிடுகிறது. இதனால்
கிராமப்புறப் பகுதிகளில் மருத்துவர்களின் எண்ணிக்கை குறைந்து
நோயாளிகளின் எண்ணிக்கை அதிகரித்து இருக்கிறது என்பது
உண்மை. இதனால் கிராமப்புறங்களில் மருத்துவர்களுடைய
சேவை என்பது அவசியமான ஒன்று. இதைக் கருத்தில் கொண்டு
அன்புமணி ராமதாஸ் எடுக்கிற முயற்சி பாராட்டுக்குரியதுதான்.
ஆனால் எதை எப்படிச் செய்யவேண்டும் என்று இருக்கிறது.
ஐந்தரை வருட மருத்துவப் படிப்பை ஆறரை வருடமாக்கினால்,
மாணவர்களுக்கு படிப்புச் செலவு எவ்வளவு ஆகும் என்பதை
எண்ணிப் பார்க்கவேண்டும். வீட்டை விற்று, காட்டை விற்று
ஐந்தரை ஆண்டுகள் மாணவர்களைப் படிக்க வைத்து
முடிப்பதற்கும் அப்பா, அம்மாக்கள் மனநோயாளிகளாக
மாறிப்போகிற காட்சிகளை நாம் பார்க்கிறோம். இந்நிலையில்
இன்னும் ஓர் வருடம் என்றால் அவர்களின் நிலை என்ன ஆவது?
ஒரு வருடம் கட்டாயக் கிராமப்புற சேவை செய்யவே மாணவர்களை
வைக்கிறோம் என்று வைத்துக்கொண்டால் அதன்பிறகு
மாணவர்கள் கிராமப்புறங்களிலேயே சேவை செய்வார்கள் என்பது
மட்டும் என்ன நிச்சயம்? எனவே இந்த அணுகுமுறையை மாற்றி
அமைத்தால் நன்றாக இருக்கும். கிராமப்புறத்தில் சேவையாற்றுகிற
மருத்துவர்களுக்கு அதிகச் சம்பளம் கொடுக்கலாம். இது
இல்லாவிட்டால் மாணவர்களை மருத்துவக் கல்லூரியில்
சேர்க்கிறபோதே கிராமப்புறத்தில் சேவை செய்யவேண்டும் என்கிற
ஒப்புதலுடன் கிராமப்புற மாணவர்களுக்கு இடஒதுக்கீடு
செய்யலாம் அல்லது கிராமப்புறச் சேவை மருத்துவர்களை
உருவாக்கும் நோக்கில் அவர்களுக்கு என்று தனி மருத்துவக்
கல்லூரி நடத்தலாம். அதைவிட்டு, திடீரென்று ஆறரை ஆண்டு
படிப்பு என்றால் மாணவர்கள் பாடு என்னாவது? பெற்றோர்கள்
பாடு என்னாவது? என்பதை மத்திய மந்திரி யோசித்து நடவடிக்கை
எடுக்கவேண்டும். எடுப்பாரா? மத்திய மந்திரி பிடிவாதம் பிடித்தால்
மாணவர்களும் பிடிவாதம் பிடிப்பார்கள் என்றுதான்
போராட்டங்களைப் பார்க்கிறபோது தெரிகிறது. பதினேழு நாளாகத்
தொடர்ந்து போராட்டம் நடத்துகிறார்கள். அவர்கள் போராட்டத்தின்
உச்சமாகத்தான் கோவை கல்லூரி மாணவர்கள்
மொட்டையடித்துக் கொள்கிற போராட்டம் நடத்தியிருக்கிறார்கள்.
பெரியார் கேட்பார், "முடிவளராதென்றால் எவனாவது மொட்டை
எடுப்பானா?' என்று. அந்தக் கேள்விக்கு மாணவர்களும் இடம்
கொடுத்திருக்கிறார்கள் என்பது வேதனையே! மொட்டையடித்துக்
கொண்ட செயல் அவர்கள் வாழ்வை மொட்டையடித்துவிடாமல்
இருந்தால் சரி.