கடந்து போதல்...

---------------------

பிஞ்சுச் சுவடுகளைக்

கவிதைகளாகப் பதிக்கும்

செல்ல மகள் ஆளுமை பற்றிக் கேட்க

நண்டின் கால்களால் எழுதி

கடற்கரை சொன்னது:

"கடலைக் கடந்ததே கவிதை'

காகிதக் கத்திக்கப்பலில் பயணித்து

அபாய எதிரலைகளில் உருக்கொள்ளும்

வெள்ளைத் தாள்களையெல்லாம்

கிழித்தெழுதி போவதைப்

பார்த்து கடல் சொன்னது:

"ஆகாயம் கடந்ததே கவிதை'

குளிர்ச்சியைப்போல் மழையை

வீட்டிற்குள் அழைத்து

வரமுடியாத கோபத்தில்

ஈசல் உதிர்த்துப் போன சிறகுகளால் பறந்து

வார்த்தைகளைப் பால்வீதியில்

தனித்தனிக் கிரகமாய் மிதக்கவிட

ஆகாயம் சொன்னது:

"சூரியனைக் கடந்ததே கவிதை'