ஃபைவ் ஸ்டார் ஓட்டல். அதிரும் மேற்கத்திய இசைக்கிடையே அங்கு அரங்கேறுகிறது ரேம்ப் ஷோ. அழகழகான ஆண்-பெண் மாடல்கள் கேட்-வாக் போட்டு வந்து அந்தப் பொருளை அறிமுகப்படுத்துகிறார்கள். ஒவ்வொரு மாடலும் வரவர கூடி நிற்கிற "காஸ்ட்லி' கூட்டம் குலுங்கி குலுங்கி கைதட்டி உற்சாகமாக வரவேற்கிறது. கிடைக்கும் வரவேற்பில் கூடுதலாக ஒருமுறை திரும்பி நின்று நளினப் புன்னகையை வாரி இறைத்துவிட்டுப் போகிறார்கள் மாடல்கள்.
ஷோ முடிகிறது. ஒவ்வொரு மாடலாகச் சென்று அவர்களுக்குப் பாராட்டு கிடைக்கச் செய்தமைக்காக ஓரத்தில் நிற்கும் இருபது வயது பிரியங்காவுக்கு நன்றி தெரிவிக்கிறார்கள். அப்படி அவர்கள் நன்றி தெரிவிப்பதற்கு பிரியங்கா, மாடல் கோ-ஆர்டினேட்டரோ, அறிமுகப்படுத்தப்பட்ட பொருளின் முதலாளியோ இல்லை. இந்நிகழ்ச்சியின் மேலாண்மையாளர்.
நிகழ்ச்சி மேலாண்மை (Event Management) இப்போது ஒரு கலையாகவே மாறி வருகிறது. இம்மேலாண்மையாளர்கள் இல்லாமல் பெரிய நிகழ்ச்சி எதுவும் இப்போது நடைபெறுவதே இல்லை. இதில் சிறப்புற்று விளங்கும் பிரியங்காவோடு பேசினோம்:
""ஸ்டெல்லா மேரீஸ் கல்லூரியில் பி.காம் படித்தேன். கடந்த ஆண்டுதான் முடித்தேன். படிக்கும்போதே அப்பா கிரண் ஜெயினோடு சேர்ந்து பேப்பர் வியாபாரம் செய்து கொண்டிருந்தேன். பிறகு நானே தனித்து ஏதாவது செய்ய வேண்டும் என்று நினைத்தேன்.
இப்போது நிகழ்ச்சி மேலாண்மைக்கு அதிக வரவேற்பு இருப்பதையடுத்து இந்தத் துறைக்கு வந்துவிட்டேன். "ஃப்ரெண்ட்ஸ் கான்செப்ட்' என்று எங்களுடைய நிறுவனத்தின் பெயர். தோழிகள் இருவரோடு சேர்ந்துதான் இந்த நிறுவனத்தை நடத்துகிறேன்.
ஒரு திரைப்படத்திற்கு இயக்குநர் எவ்வளவு முக்கியமான நபரோ அதைப்போல ஒரு நிகழ்ச்சி அழகாக, சுவாரஸ்யமாக நடைபெறுவதற்கு மேலாண்மையாளர் முக்கியமானவர்.
ஒரு பொருளை அறிமுகப்படுத்துகிற நிகழ்ச்சி என்று வைத்துக் கொள்வோம். நிறுவனத்தார் எங்களுடைய பங்களிப்பு எப்படி இருக்க வேண்டும் என்று விரும்புகிறார்களோ அதன்படிதான் நாங்கள் செய்கிறோம். நிகழ்ச்சி நடத்துவதற்கான முழு பொறுப்பையும் எங்களிடம் விட்டால்கூட அதைச் செய்கிறோம்.
எந்தப் பகுதியில், என்ன வகையான பொருளை அறிமுகப்படுத்துகிறோம் என்பதை உணர்ந்து அதை நம்முடைய "கிரியேட்டிவிடி'யோடு சேர்ந்து அறிமுகப்படுத்துகிறோம். கிரியேட்டிவ்தான் இத்துறையின் உயிர் போன்றது. கிரியேட்டிவிட்டி இல்லாமல் இத்தொழிலில் நிற்க முடியாது.
பொருள்களை அறிமுகப்படுத்திற நிகழ்ச்சி என்றுதான் இல்லை. அரசு, நிறுவனங்கள், விஐ.பி.களின் குடும்ப நிகழ்ச்சிகள் என அனைத்தையும் மேலாண்மை செய்கிறோம். இதுபோன்ற நிகழ்ச்சிகளுக்கு கிரியேட்டிவ் பணியோடு, வந்திருப்பவர்களை கலகலப்பாக வைத்திருக்கக்கூடிய சுவாரஸ்ய நிகழ்ச்சிகளும் தேவை. என்ன மாதிரியான சுவாரஸ்ய நிகழ்ச்சிகளை அரங்கேற்றலாம். எந்த நேரத்தில் அந்த நிகழ்ச்சிகளை வழங்கலாம் என்பதை வகுத்துக் கொடுக்கிறோம்.
எயிட்ஸ் தொடர்பான நிகழ்ச்சி ஒன்று சமீபத்தில் நடந்தது. இதில் குஷ்பு கலந்துகொண்டார். இந்த நிகழ்ச்சியை நாங்கள்தான் மேலாண்மை செய்தோம். நாங்கள் வழங்கிய முறையில் குஷ்புடன் வந்திருந்தவர்களும் கவரப்பட்டு நன்றாக இருந்ததாகப் பாராட்டினார்கள். இதைப்போல தாஜ் கோரமண்டல் ஓட்டலில் "ரேம்ப் ஷோ' ஒன்றை மேலாண்மை செய்தோம். தமிழகத்தின் டாப் மாடல்கள் எல்லாம் இதில் கலந்து கொண்டார்கள். இதை வழங்கிய முறைக்காகவும் நாங்கள் பாராட்டப் பெற்றோம்.
இப்போது தமிழக அளவிலேயே செய்து கொண்டிருக்கிறோம். போகப்போக இந்தியா முழுவதும் இயங்குவதுடன் உலகின் மிகப்பெரிய நிறுவனமாகக் கொண்டு வரவேண்டும் என்ற ஆசை இருக்கிறது.
இதைப்போல "ஃப்ரெண்ட்ஸ் கான்செப்ட் கிளப்' ஒன்றையும் தொடங்கத் திட்டமிட்டிருக்கிறோம். இதில் கிரியேட்டிவ் எண்ணங்கள் உள்ள இளைஞர்களை எல்லாம் ஒருங்கிணைத்து சமூகத்துக்கு ஏதாவது உதவ வேண்டும் யோசித்துக் கொண்டிருக்கிறோம். அது எந்த வகையில்? என்ன வகையில்? என்பதையெல்லாம் இன்னும் திட்டமிடவில்லை'' என்கிறார் பிரியங்கா.
""உங்களுடைய சொந்த விருப்பங்களின் மேலாண்மையாளர் யார்?'' என்று கேட்டால், சிறிது நேரத் தயக்கத்திற்குப் பிறகு வருகிற பதில் ""அப்பா, அம்மா''.
No comments:
Post a Comment