நிழல் மின்சாரம்

வெயில் வேய்ந்திருந்த சாலையில்

பெரிய சைக்கிளைத்

தாவித்தாவி

மிதித்துப் போன சிறுவன்

நாலு மின்கம்பிகளின்

நீள நிழல்களைக் கண்டான்

விளையாட்டு மனம்

சக்கரமாகச் சுழலத் தொடங்கியது

இரு மின்கம்பி நிழல்களின்

இடைப்பட்ட வெயிலை

நிழலின் மதிலாக நினைத்து

அதன் மேல்

ஒடித்தொடித்து வளைந்து

விளம்புகளில் நழுவிநழுவி

வித்தை காட்டிக் கொண்டே

சில மிதிகள் போனான்

எதிர்பாராமல்

திடுமென பின்னால் வந்தது

சிற்றுந்தின் பெருஞ் சத்தம்

அதில் நிழல் கம்பிகளில்

தொற்றிய மின்சாரம் பாய்ந்து

தூக்கியடிக்கப்பட்டான்

மதிலிலிருந்து சாலைக்கு.
நன்றி: வார்த்தை