Friday, January 28, 2011

இடமுடியாத முட்டை



1

கொண்டைக் குருவியின் வயிற்றுக்குள்ளிருக்கும் முட்டைக்குள்ளிலிருந்தவாறே நானும் பல வருடங்களாகப் பறந்துகொண்டிருக்கிறேன். எனக்குள் என் மனம் பறக்காமல் இங்குதான் அமைதியாய் இருக்கிறது. இந்த இடத்திற்கு நீங்களும் வர ஆசைப்பட்டால் ஒரு புழுவாக மாற உங்களுக்குத் தெரிந்திருக்க வேண்டும். புழுவாக மாறாமல் நேராகவே இங்கு வர எத்தனையோ முறை நானும் முயற்சித்துப் பார்த்திருக்கிறேன். அலகுகள் திறக்கப்படவே
இல்லை. ஒரு நாள் புழுவாக மாறி வந்து நின்றபோது எதிர்ப்பு எதுவும் தெரிவிக்க முடியாமல் என்னை அது விழுங்கி முடித்தது. எச்சமாக என்னை வெளியேற்ற முயற்சித்தபோது, பிடிவாதம் பிடித்து அதன் முட்டைகளில் ஒன்றுக்குள் வந்துவிட்டேன். ஒரு நாள் கூடு கட்டி எல்லா முட்டைகளையும் அதில் இட்டபோது என்னையும் இட்டுவிடத்தான் எண்ணியது. நான்தான் வயிற்றுக்குள்ளேயே இருக்க ஆசைப்படுவதாக அடம்பிடித்தேன். என் அடம் அதற்குப் பிடித்து என்னை மட்டும் வயிற்றுக்குள்ளேயே வைத்துக்கொண்டது. ஒருவகையில் அதுவும் நல்லதாகவே அமைந்தது. இரை தேடிப்போன ஒரு பொழுதில் சிறுவர்கள் கூண்டைப் பிய்த்துப் போட்டுவிட்டு முட்டைகள் அனைத்தையும் எடுத்து, உடைத்தும் விளையாடிவிட்டார்கள். நான் மட்டும் மிஞ்சினேன். இட்டுவிட முடியாத முட்டையாக என்னை எங்கும் அது சுமந்து பறக்கிறது.

No comments: